फिल्म ‘कार्साङ’ लाई प्रिमियरमा रुचाइएको छ । बुधबार प्रिमियरमा प्राप्त प्रतिक्रियाले दर्शकलाई हलसम्म तान्न दुई मत नरहने अड्कल काट्न सकिन्छ । शेर्पा समुदायको संस्कृति र परम्परामा आधारित भएर बनेको फिल्मलाई चलचित्र विकास बोर्डका अध्यक्ष तथा निर्देशक दिनेश डिसीले ‘कार्साङ’ यथार्थपरक फिल्म रहेको बताए । उनले भने, ‘यो फिल्म यथार्थपरक छ । सबै फिल्मको आ-आफ्नो जनरा हुन्छ । ‘कार्साङ’को जुन जनरा छ, त्यसमा राम्रोसँग चरित्र निर्माण गरिएको छ । र, गहिराइमा गएर कथा भनिएको छ । त्यो हिसाबले फिल्म एकदमै राम्रो छ ।’
यसै गरी निर्देशक तथा अभिनेत्री दीपाश्री निरौलाले शेर्पा समुदायको संस्कृतिलाई फिल्मले जीवन्त रुपमा प्रस्तुत गरेको धारणा व्यक्त गरिन् । उनले पनि जितुको प्रशंसा गर्न छुटाइनन् । ‘जितुको क्यारेक्टर एकदमै रमाइलो छ । र, फरक पनि देखिएको छ,’ उनले भनिन् । केही कुरासँग लगाव र आत्मीयता कस्तो हुन्छ भन्ने पनि फिल्मले महसुस गराएको उनको भनाइ थियो । प्रिमियरमा निर्देशकहरु दीपेन्द्र के. खनाल, अशोक शर्मा, कलाकारहरु अनुप बराल, किरण केसी, गायक कमल खत्रीलगायतको पनि उपस्थिति थियो ।यम शेर्पाको लेखन तथा निर्देशनमा बनेको फिल्मले अभाव, गरिबी र शेर्पा समुदायको सांस्कृतिक कथावस्तुलाई प्रस्तुत गरेको छ ।
फिल्ममा दयाहाङ झाँक्रीको भूमिकामा छन् । उनी पहिलो पटक यसप्रकारको भूमिकामा देखिएका हुन् । बुद्धि तामाङ, डोमा ह्योल्मो, प्रेम लोप्चन, सुरवीर पण्डितलगायतको पनि अभिनय रहेको छ । यही शुक्रबार (पुष २६ गते)बाट फिल्म प्रदर्शनमा आउँदैछ ।
