वर्ष २०८१ अभिनेत्री केकी अधिकारी र नीता ढुंगानाका लागि निकै सफल र स्मरणीय रह्यो। केकीले निर्माण र अभिनय गरेको फिल्म बोक्सीको घर ले बक्स अफिसमा १० करोडभन्दा बढीको व्यापार गर्दै कीर्तिमान कायम गर्यो। उता, नीताले निर्माण तथा अभिनय गरेको फिल्म ह्रस्व दीर्घ ले पनि सकारात्मक प्रतिक्रिया र राम्रो कमाइ बटुल्यो।
अब यी दुई चर्चित अभिनेत्री दुई-दुईवटा नयाँ फिल्म निर्माणमा जुटेका छन्। केकी अधिकारीले बोक्सीको घर २ केही समयका लागि स्थगन गर्दै चलचित्र विकास बोर्डबाट भद्रकाली र राधा पियारी नामक दुई नयाँ फिल्म निर्माणको अनुमति लिएकी छन्। सोमबार दर्ता गरिएका यी फिल्ममध्ये भद्रकाली मा उनका भाइ विम्ब अधिकारीको निर्देशन रहनेछ भने राधा पियारी को निर्देशन सञ्जय चौलागाईंले गर्नेछन्। दुबै फिल्ममा केकीको मुख्य भूमिका रहनेछ।
उता, नीता ढुंगानाले पनि सोमबार नै एक दुई तीन र सुख दुःख नामक दुई नयाँ फिल्म निर्माणको अनुमति लिएकी छन्। दुबै फिल्ममा उनी निर्माता र कलाकारका रूपमा रहनेछिन्। केही समयअघि उनले आफ्नो सफल फिल्म ह्रस्व दीर्घ को सिक्वेल बनाउने तयारीमा रहेको बताएकी थिइन्, तर हाललाई त्यो प्रोजेक्ट होल्ड गर्दै दुई नयाँ फिल्मको तयारीमा लागेकी छन्।
सोमबार केकी र नीतासहित जम्मा १२ जना निर्माताले चलचित्र विकास बोर्डबाट फिल्म निर्माणको अनुमति लिए, जुन नेपाली फिल्म इतिहासमै पहिलो पटक एकैदिनमा १२ फिल्म दर्ता भएको अभिलेख हो। यसले नेपाली चलचित्रमा निर्माता तथा कलाकारको आकर्षण बढ्दो रहेको संकेत गर्दछ। यदि कात्तिकदेखि जेठ तेस्रो सातासम्म इजाजत लिएका सबै फिल्म निर्माण भएमा, यस वर्ष रिलिज हुने नेपाली फिल्महरूको संख्या १०० नजिक पुग्नेछ।
