‘षडङ्ग’ फेम्ड निर्देशक सुरज सुनुवारको निर्देशनमा नयाँ नेपाली फिल्म ‘घोस्टेल’ निर्माण हुने भएको छ। बुधबार निर्माण कम्पनी अनन्या फिल्म्सले फिल्मको थिम पोस्टर सार्वजनिक गर्दै यसबारे औपचारिक जानकारी दिएको हो।

पोस्टरमा एउटा पुरानो देखिने भवनको पृष्ठभूमिमा ‘When Horror Meets Ha-Ha’s’ (जब त्रासले हाँसोलाई भेट्छ) भन्ने नारालाई प्राथमिकता दिइएको छ। यसले फिल्मले हरर-कमेडी शैली अँगाल्ने स्पष्ट संकेत गर्छ। नेपाली सिनेमा उद्योगमा यस्तो शैली कम देखिएकाले घोस्टेल नयाँ स्वाद बोकेको फिल्म हुने अपेक्षा गरिएको छ।

फिल्मको कथा सुयोग गुरुङको हो, जसले यसअघि ‘फर्की फर्की’ निर्देशन गरिसकेका छन्। ‘घोस्टेल’मा उनी निर्देशकको भूमिकामा भने रहने छैनन्; निर्देशन सुरज सुनुवारले गर्नेछन्। फिल्मलाई सरोज न्यौपाने र सुयोग गुरुङले संयुक्त रूपमा निर्माण गर्नेछन्। यी दुईबीच **‘जेरी अन टप’**मा पहिल्यै सहकार्य भइसकेको हो।

निर्माता सरोज न्यौपानेका अनुसार, तिहारपछि फिल्मको छायांकन सुरु गरिनेछ। हाल कलाकारहरूको लाइनअप टुंगिएको छैन, तर छायांकन सुरु हुनु अगाडि सम्पूर्ण कास्ट एण्ड क्रूको घोषणा गरिने जनाइएको छ।फिल्म सन् २०२६ मा प्रदर्शन गर्ने लक्ष्य राखिएको छ।