भारतको सबैभन्दा सफल फिल्म फ्रेन्चाइजमध्ये एक यशराज फिल्म्सको ‘स्पाई यूनिभर्स’ले अब ‘वार २’ मार्फत आफ्नो यात्रालाई अगाडि बढाउँदैछ। शुक्रबार सार्वजनिक गरिएको फिल्मको ट्रेलरमा दर्शकले उच्च स्तरको एक्सन, सस्पेन्स, रोमान्स र इमोसनको सम्मिलन अनुभव गर्न सक्ने छन्।ऋतिक रोशन र जूनियर एनटीआर मुख्य भूमिकामा रहेको फिल्मको ट्रेलर साढे दुई मिनेट लामो छ। ट्रेलरमा आकाशमा प्लेनमाथिको भिडन्तदेखि समुद्रमा जहाजमाथि भएको लडाइँ, शक्तिशाली विस्फोट, कार क्र्यास लगायतका थ्रिलिङ दृश्यहरू देख्न सकिन्छ।फिल्ममा ऋतिक र एनटीआर एकअर्काका कडा शत्रुको भूमिकामा देखिन्छन्, जसले फिल्म बदलाको कथामा आधारित भएको संकेत गर्छ। कियारा आडवाणी फिल्ममा ऋतिकको अपोजिटमा छिन् र उनको पनि दमदार एक्सन सिन ट्रेलरमा समावेश गरिएको छ।फिल्मको निर्देशन अयान मुखर्जीले गरेका हुन्। सन् २०१९ मा आएको ब्लकबस्टर फिल्म *‘वार’*को यो सिक्वेल हो, जसमा ऋतिकसँगै टाइगर श्राफ थिए। तर ‘वार २’मा टाइगर छैनन्।करीब ४ सय करोड भारु बजेटमा निर्माण गरिएको फिल्ममा आशुतोष राणा, अनिल कपूर, दिशिता सहगल लगायतका कलाकारको पनि अभिनय छ।खास कुरा के छ भने, चर्चा अनुसार फिल्ममा आलिया भट्ट र शर्वरी वाघको केमियो उपस्थिति पनि रहनेछ। उनीहरू यशराजको अर्को स्पाई फिल्म *‘अल्फा’*सँग जोडिएको पोस्ट-क्रेडिट सिनमा देखिने सम्भावना छ।‘वार २’ साउन ३० गते (१५ अगस्ट)देखि विश्वव्यापी रूपमा प्रदर्शनमा आउनेछ।