नेपाली चलचित्र उद्योगमा केही यस्ता कलाकार छन्, जो सँगै पर्दामा देखिँदा दर्शकमा उत्साह देखिन्छ । यस्तै मध्येका दुई कलाकार हुन्, दयाहाङ राई र सौगात मल्ल । यी दुई कलाकार एउटै चलचित्रमा देखिँदा चलचित्रको हाइप नै बढ्छ र दर्शकमा प्रतिक्षा हुन्छ ।
यो अवसर फेरि एकपटक जुराइदिएको छ, चलचित्र ‘मितज्यू’ले । ‘मितज्यू’मा सौगात र दयाहाङ एक साथ देखिँदैछन् । दुई मितको कथा हो, ‘मितज्यू’ । र, ‘मितज्यू’मा सौगात र दयाहाङ मित हुन् । यी दुई मितबीच एक युवतीको प्रवेश र रुटमा हालेको गाडीलाई लिएर चलचित्रमा हुने उतारचढावको कथामा ‘मितज्यू’ बनेको छ ।
त्यसैले यो चलचित्रको द्वन्द्व भनेकै सौगात र दयाहाङबीच छ । यी दुई कलाकारबीच हुने नोकझोक र टसलको वरिपरि सिनेमा घुम्छ ।
“यी दुई कलाकारको टकराब हाम्रो चलचित्रमा गज्जवले हेर्न पाइन्छ । यी कलाकारबीचको मतभेद र द्वन्द्व नै चलचित्रको मुख्य आकर्षण हो,” निर्देशक अनिल बुढा मगर भन्छन्, “हामीले हेर्दा दयाहाङ र सौगात दुवै चलचित्रको हिरो हो, तर पनि द्वन्द्व पनि उहाँहरू बीच नै हुन्छ भने पक्कै पनि दर्शकले मन पराउनु हुनेछ भन्ने लागेको छ ।” मित लगाएर मितको साइनोमा बाँधिइसकेपछि फेरि कसरी झगडा सम्भव र त्यसको बैठान कसरी हुन्छ भन्ने कौतुहलता सिनेमाले मेटाउने उनी बताउँछन् ।
वास्तवमा दयाहाङ र सौगातबीच जुन चलचित्रमा टकराव छ, त्यही हिट भएको विगत छ । ‘कबड्डी’ र ‘लुट’ यसका उदाहरण हुन् । त्यसैले यी दुईबीचको टकराब दर्शकले ‘मितज्यू’मा पनि मन पराउने निर्देशक अनिलको विश्वास छ ।
चलचित्र ‘मितज्यू’ जेठ ८ गतेबाट प्रदर्शनमा आउँदैछ । चलचित्रमा अभिनेताद्वय सौगात मल्ल र दयाहाङ राईसँगै तेरिया मगर मुख्य भूमिकामा छन् । सौगात, दयाहाङ र तेरियासँगै यो चलचित्रमा खड्गबहादुर पुन मगर (खबपु), शिशिर वाङ्देल, पुस्कर गुरुङ, राज थापा, सुवर्ण थापा, अनु थापा, स्मिता लामिछानेलगायतको अभिनय रहेको छ ।
जनक घर्ती मगरले निर्माण गरेको चलचित्रलाखई लोकेश बज्राचार्यले सम्पादन गरेका छन् । शिशिर बिशंखेको सिनेमेटोग्राफी रहेको छ । नेपाली ग्रामीण परिवेशको कथा ‘मितज्यू’ले भन्ने भएकाले दर्शकले मन पराउनेमा निर्माण टिम ढुक्क छ ।
