यो शुक्रबार देश ब्यापी रुपमा दुइ चलचित्र रिलिज भए । प्रतिक्षारत यि दुइ चलचित्र हुन् 'जात्रै जात्रा' र 'बिर विक्रम २' सफल चलचित्रका सिक्वेल दुबै चलचित्रमा अहिलेका प्रतिष्पर्धामा रहेका नायिकाहरु वर्षा राउत र वर्षा सिवाकोटी मुख्य भूमिकामा छन् । यसैबिच चलचित्र 'जात्रै जात्रा'ले आक्रमक ब्यपारको सुरुवात गरेको छ । रिलिजको पहिलो दिन चलचित्रले ६०/७० को अकुपेन्सी पाएको थियो भने दोश्रो दिन सनिबार सबै हलहरुमा शतप्रतिशत अकुपेन्सी हात पारेको छ ।
प्रीमियरमा नै राम्रो प्रतिकृया पाएको 'जात्रै जात्रा'को 'वर्ड अफ माउथ' बलियो भएका कारण पनि फिल्म हेर्ने दर्शकको ठूलो भीड हलमा ओर्लिएको हो । सिंगल र मल्टीप्लेक्स दुबैमा राम्रो सोज पाएको छ भने दर्शकको चाप सिङ्गल थिएटरमा भन्दा मल्टिप्लेक्समा बढी रहेको छ । मल्टीप्लेक्स चेन क्यूएफएक्सले फिल्मलाई शुक्रवार १९ सोज बाँडेको थियो । अधिकांश सोज हाउसफुल भएका थिए । शनिवार जय नेपालमा एक सोज बढाएर २० सोज पुर्याएको छ । शनिवार पनि कुनै सोजका सिट खाली भएका छैनन् ।
दर्शकको प्रतिकृया बुझ्न चलचित्र टिम सनिबार गोपिकृष्ण हल पुग्दा दर्शकले चलचित्रको खुलेर प्रशंसा गरेको निर्देशक प्रदिप भट्टराई बताउँछन् ।‘जात्रै जात्रा’ को राजधानीको मात्र रिपोर्ट राम्रो छैन । मोफसलमा सञ्चालित मल्टीप्लेक्स स्क्रिन र सिंगल थिएटर जताततै फिल्म हाउसफुल रहेको वितरकले जानकारी दिएका छन् ।
‘जात्रै जात्रा’ मा विपिन र वर्षाका साथमा दयाहाङ राई, रविन्द्र झा, रविन्द्र सिंह बानियाँ, राजाराम पौडेललगायतका कलाकारहरुको अभिनय छ । ‘जात्रा’ जहाँ अन्त्य भएको थियो सिक्वेल त्यहींबाट सुरु भएको छ । सामान्य कथाबस्तुलाई समातेर निर्माण गरिएको भए पनि दर्शकलाई बाँध्न सक्ने प्रस्तुती कलाकार र निर्देशकले दिएका छन् ।
