गत हप्ता नेपाली र जतपटमा धेरै चर्चा परिचर्चा पाएको विषय भनेको नै निर्देशक छवि ओझा र नायिका शिल्पा पोख्रेलको विवाद नै हो । यसबाहेक साना तिना विवाद र कन्ट्रोभर्सी भनेकै चलचित्र क्षेत्रलाई चलायमान देखाउने कुराहरु हुन् । चलचित्र क्षेत्रमा सानोतिनो उत्सव त जहिल्यै भइरहेकै हुन्छ । यसै गरी यो हप्ता पनि नेपाली कलाकार र समग्र चलचित्र क्षेत्रले आफ्नो गति लिइरहन सफल भयो । हेरौँ तस्बिरमा यो हप्ता ।   

अघिल्लो हप्ताबाट प्रदर्शनमा आएको चलचित्र ‘सानो मन’ ले शुक्रवारबाट दोस्रो हप्तामा प्रदर्शन थालनी गरेको छ । चलचित्रको बिहीबार कलाकारहरूको उपस्थितिमा विशेष सो आयोजना गरिएको थियो । चलचित्र हेर्न दीपकराज गिरी, दीपाश्री निरौला, केदार घिमिरे, नम्रता श्रेष्ठ, केकी अधिकारी, रिमा विश्वकर्मा, विशाल भण्डारी, अर्जुन घिमिरे 'पाँडे', कुमार कट्टेल 'जिग्री' लगायत पुगेका थिए ।

चलचित्र ‘मिस्टर नेपाली’ को सुटिङ प्याक अप भएको छ । देव भुसालको निर्देशनमा तयार भएको चलचित्रको छायाङ्कन करिब ४५ दिनमा सकिएको निर्माणपक्षले जानकारी दिएको छ । गत हप्ता काठमाडौँमा पत्रकार सम्मेलन आयोजना गरी आयोजना गरिएको इन्ड क्ल्याप पार्टीमा चलचित्र तिहारको अवसर पारेर प्रदर्शन गरिने बताइएको छ ।  लामो समय पछि अभिनयाँमा फर्किएका अभिनेता भुवन केसी चलचित्रमा दोहोरो भूमिकामा छन् ।

अभिनेत्री ॠचा शर्माको हिजो अर्थात् साउन १ गते जन्मदिन परेको थियो । नेपाली चलचित्र जगतमा चर्चा परिचर्चाको पछाडि लाग्न नरुचाउने र आफ्नो कामलाई प्राथमिकता दिने अभिनेत्रीको रूपमा चिनिएकी ॠचाले साउन १ गते परेको आफ्नो जन्मदिन सार्वजनिक रूपमा साउन २ गते मनाइन् । उनको जन्मदिन मनाउन उनका नजिक का कलाकार साथीहरू तथा सञ्चारकर्मी उपस्थित थिए । अभिनेत्री हरू को बाहुल्य उपस्थिति रहेको सेलिब्रेसनमा रेखा थापा, रिमा विश्वकर्मा, केकी अधिकारी, प्रियंका कार्की लगायत उपस्थित थिए ।  

चलचित्र ‘लप्पन छप्पन २’को यति बेला छायाङ्कन भइरहेको छ । मुकुन्द भट्टको निर्देशनमा निर्माणाधिन चलचित्रको केही सिन खिच्न चलचित्रका मुख्य अभिनेता सौगात मल्ल बडीगार्ड सहित राजधानीको व्यस्त अस्पताल पुगेका थिए । सेटमा उनी भिन्न गेट अपमा प्रस्तुत भएका थिए । 

नायिका प्रियंका कार्की को आफ्नै ब्यानरमा निर्माण हुन लागेको वेब सिरिज 'जस्ट अनोदर लभ स्टोरी'मार्फत निर्देशकको रूपमा डेब्यु गर्दै छिन् । यसै वेब सिरिजको लागी निर्माण टिमले फ्रेस अनुहार को माग गर्दै अडिसन आयोजना गरेको थियो । फरक विषय वस्तुमा निर्माण हुन लागेको सिरिज मा प्रियंका आफै पनि अभिनय गर्दै छिन् ।  

यो हप्ता अभिनेता अर्पण थापाको निर्देशनमा बनेको हरर चलचित्र 'घर' प्रदर्शन भइरहेको छ । शुक्रवारदेखि देश व्यापी रूपमा प्रदर्शनमा आएको 'घर' दर्शकलाई चलचित्रको फरक स्वाद चखाउने चलचित्र हो । 'घर'मा मृत आत्माले लिएको बदलाको कथा रहेको छ । चलचित्रमा निर्देशक अर्पणसँगै सुरक्षा पन्त र बेनिशा हमाल, अस्मिता खनाल, सरोज अर्याल, सृष्टि महर्जन र विकास खनालको पनि प्रमुख भूमिका रहेको छ ।