चलचित्र पत्रकारिता गर्दै आएका पत्रकारहरूको संस्था चलचित्र पत्रकार सङ्घ, नेपालको आयोजनामा पोखरामा तीन दिने ‘चलचित्र पत्रकारिता कार्यशाला’ सुरु भएको छ । बुधवारबाट पोखरामा रहेको नेपाल पर्यटन बोर्डमा सुरु भएको कार्यशाला शुक्रवार सम्पन्न हुनेछ । चलचित्र पत्रकार सङ्घले पोखरा शाखा र चलचित्र विकास बोर्डको सहकार्यमा आयोजना भएको कार्यशालाको उद्घाटन समारोहमा गण्डकी प्रदेशका उद्योग, पर्यटन, वन तथा वातावरण मन्त्री विकास लम्साल, नेपाल पत्रकार महासङ्घका केन्द्रीय सदस्य रामकृष्ण ज्ञवाली र कास्की अध्यक्ष दीपेन्द्र श्रेष्ठ, फिल्म निर्देशक धनश्याम लामिछाने, नेपाल पर्यटन बोर्ड गण्डकी प्रदेशका प्रबन्धक सूर्य थपलिया, चलचित्र पत्रकार सङ्घका कास्की संस्थापक अध्यक्ष श्रीराम सिग्देललगायतका व्यक्तित्वहरूको उपस्थिति रहेको थियो ।
फिल्ममार्फत देशको पर्यटन प्रवर्द्धनमा निकै ठुला भूमिका रहेको उल्लेख गर्दै मन्त्री विकास लम्सालले ‘पर्यटन वर्ष २०२०’ लाई ‘चलचित्र पत्रकारिता कार्यशाला’ ले सहायक भूमिका खेल्नेमा विश्वास व्यक्त गरे । कार्यशालामा सहभागी हुन राजधानीबाट ८० जना र चितवनलगायतका शाखाबाट १० बढी फिल्म पत्रकारहरू पोखरामा भेला भएका छन् । कार्यशालामा प्रशिक्षकको रूपमा रहेका वरिष्ठ पत्रकार राजेन्द्र दाहालले आज पत्रकारिताको आचारसंहितालगायतका विषयमा प्रशिक्षण दिनेछन् । कार्यशालामा पत्रकार आचारसंहिता तथा मिडियासम्बन्धी कानुन, चलचित्र, समीक्षा, डिजिटल पत्रकारिता, चलचित्र पत्रकारिता, पर्यटन, फोटो तथा मल्टिमिडिया सम्बन्धी दक्षताको बारेमा छलफल हुने बताएको छ ।
