एक समय ‘एक्सन स्टार’ को रूपमा सर्वाधिक रुचाइएका अभिनेता बिराज भट्ट ब्याक भएका छन् । भोजपुरी चलचित्र लामो समय बिताएका उनले ४ वर्ष अगाडि रोज राणा निर्देशित फिल्म ‘जय परशुराम’ बाट नेपाली फिल्म इन्डस्ट्रीमा पुनः हात हालेका थिए । चार वर्ष पछि भट्टको नयाँ चलचित्र ‘साङ्लो’को ट्रेलर सार्वजनिक भएको छ । शुक्रवार राजधानीको एक सिनेमा हलमा चलचित्रको कलाकार र सञ्चार कर्मीबिच चलचित्रको ट्रेलर सार्वजनिक गरिएको थियो । साङ्लोमा अभिनेता भट्टको अपोजिट पूर्व मिस नेपाल निकिता चाण्डक देखिएकी छिन् ।

विराजको आफ्नै निर्माण, अभिनय र निर्देशनमा फिल्म ‘साङ्लो’ माघ २४ गतेबाट प्रदर्शन हुने छ । चलचित्रकी मुख्य नायिका निकिताले आफूले विराजको चलचित्रबाट डेब्यु गर्न पाउँदा निकै खुसी भएको बताएकी छिन् । चलचित्रको ट्रेलर सार्वजनिक कार्यक्रममा उद्घोषक नरेश भट्टराईले विराजलाई बाघको उपनाम दिइँदै प्रशंसा गरे । यसै प्रसङ्गमा उनलाई ‘बाघ फर्किएकै हो त ?’ भन्ने प्रश्न गरियो जसको जवाफमा विराजले 'बाघ कहाँ गएको थियो र फर्किनलाई ? बाघ जङ्गलभन्दा बाहिर गएको थिएन' भन्दै जवाफ दिए । उनले बाघले सिकार गर्नका लागि केही समय जङ्गल परिवर्तन गरेको समेत बताए ।

साथमा ट्रेलर रिलिज कार्यक्रममा वरिष्ठ गायक तथा कलाकार जयनन्द लामाले अभिनेता बिराज भट्टलाई ‘महान् कलाकार’ को रूपमा सम्बोधन गरे । साथै ‘बिराज भट्ट जस्तो ‘महान् कलाकार’ सँग ‘साङ्लो’ मा काम गर्न पाउँदा निकै खुसी भएको पनि भने ।