आगामी चैत २८ गते देशव्यापी रूपमा प्रदर्शनमा आउने चलचित्र ‘प्रेमगीत ३’ को छायाङ्कन सम्पन्न भएको छ । ७० दिन लगाएर चलचित्रको सम्पूर्ण छायाङ्कनको काम सम्पन्न गरिएको हो । कीर्तिपुरमा तयार गरिएको भव्य सेट र मनाङमा गरी खिचिएको चलचित्रको प्याक अप भएको निर्माता निर्देशक सन्तोष सेनले जानकारी दिएका हुन् । मङ्गलवार छायाङ्कन सकिएपछि बुधवार चलचित्रको जम्बो टोली काठमाडौँ आइपुगेको छ ।

यद्यपि चलचित्रको एक प्रोमोसनल गीत भने खिच्न बाँकी रहेको निर्माता सेनले बताएका छन् । चलचित्रको मनाङमा छायाङ्कन हुँदै गर्दा यता सम्पादनको काम पनि चलिरहेको थियो त्यसैले कलर करेक्सन, ब्याक ग्राउन्ड स्कोर र डबिङको काम सकेर टिम प्रचार प्रसारमा निस्किने बताइएको छ । चलचित्रमा नव-अभिनेत्री क्रिस्टिना गुरुङ, प्रेम पुरी, लक्ष्मी बर्देवा, सुनिल थापा, सन्तोष सेन, माओत्से गुरुङ, पुष्कर कार्की, अनुभव रेग्मी, संवृद्धि शाही ठकुरीलगायतका कलाकारहरूको पनि अभिनय रहनेछ ।

आसुशेन फिल्मस् प्रोडक्सनको प्रस्तुति यस चलचित्रमा कल्याण सिंह र एलिश कार्कीको सङ्गीत रहेको छ भने राजेश श्रेष्ठले डिओपी, हिमाल केसीले एक्सन, कविराज गहतराजको कोरियोग्राफी रहेको छ ।  भूपेन्द्र अधिकारीले सम्पादनको काम सम्हालिरहेको 'प्रेमगीत ३' श्वसतिमा खड्काको मुख्य भूमिका रहेको चलचित्र ‘चपली हाइट ३’ सँग प्रतिस्पर्धामा उत्रने छ ।