केही वर्ष अघि नेपाली चलचित्रको लागी रेखा थापा एउटा ब्रान्ड नै थियो । दर्शक उनलाई पर्दामा हेर्न निकै उत्साहित हुन्थे र आफ्नो चलचित्रमा रेखालाई लिन निर्माताको लर्को नै लाग्थ्यो । समय सधैँ उही कहाँ हुन्छ र ? समयसँगै मान्छेका रोजाइ अनि समयको माग पनि बदलिँदै जान्छ । तर समय जति नै बदलिए पनि नेपाली फिल्म इन्डस्ट्रीमा जति नै नायिकाको प्रवेश भए पनि दर्शकले माया मार्न नसक्ने रेखा फेरी दर्शकको माझमा आएकी छिन् । उनले झन्डै दुई दशक अगाडी चलचित्र 'हिरो' बाट नेपाली फिल्म इन्डस्ट्रीमा पाइला राखेकी थिइन् भने यसै नामसँग मिल्दो नाम रहेको चलचित्र 'हिरो रिटर्न्स' लिएर आएकी छिन् ।

पछिल्लो समय रेखा अभिनेत्रीको रूपमा मात्र नभएर आफै चलचित्र निर्माण पनि गरिरहेकी छिन् । बुधवार रेखा र सविन श्रेष्ठको मुख्य भूमिका रहेको चलचित्र 'हिरो रिटर्न्स'को ट्रेलर सार्वजनिक गरियो । अभिनेता सविन श्रेष्ठको आग्रह नकार्न नसकेर उनले यस चलचित्र गरेको उनले बताएकी छिन् । आशिष भेटवालले निर्देशन गरेको चलचित्रको ट्रेलर रिलिज कार्यक्रममा उनले आफ्नो पहिलो चलचित्र 'हिरो'लाई स्मरण गरिन् । यसै बिच कार्यक्रममा रेखाले चलचित्र पत्रकारले चलचित्रको समाचार लेख्दा पनि पैसा लिने आरोप लगाइन् भने यसै विषयमा पत्रकारसँग उनको सवाल जवाफ पनि चल्यो । उनले आफूले पनि थुप्रै चलचित्र पैसा नलिई गरेको सुनाइन् ।  

चलचित्रमा रेखा र सविनका साथमा दिल श्रेष्ठ, सुलेमान शङ्कर, सरोज खनाल लगायतको अभिनय रहेको छ । चलचित्रमा अभिनेता सरोज खनाल भिलेन अवतारमा देखिने छन् । आशिष भेटवालले निर्देशन गरेको चलचित्रमा चन्द्र गौतम, सहदेव गौतम र भीम न्यौपानेको लगानी रहेको छ ।  चलचित्र वैशाख २६ गते देखि प्रदर्शनमा ल्याउने तयारीमा छ ।